Алеся Голикова: «Барыта оҕолорум тустарыгар»

Аҕыс оҕоҕо күн сирин күндүтүн көрдөрбүт 38 саастаах эдэр ийэ Алеся Голикова «Мама-предприниматель» федеральнай бырагыраама эрэгийиэннээҕи түһүмэҕин биир сүрүн кыттааччыта.

Биэс сыл анараа өттүгэр элбэх оҕолоох Голиковтар дьиэ кэргэттэрэ киэҥ сиргэ сайдар кыах үгүһүн учуоттаан, Абый улууһун Белая Гора бөһүөлэгиттэн Жатай бөһүөлэгэр кэлэн олохсуйбуттар.  Күн бүгүн улахан дьиэ кэргэн аҕа баһылыга түмэл дириэктэринэн үлэлиир.

Эдэр ийэ бу бырагыраамаҕа олус сонун, сэдэх тус бырайыагынан кыттар. Бырайыага — уҥуохтан уонна тимиртэн эгэлгэ оҥоһуктар, кини оҥоһуктарын нөҥүө аҕыйах ахсааннаах хотугу омуктар култуураларын, абыычайдарын, олохторун-дьаһахтарын баайын билиҥҥи көлүөнэлэргэ тиэрдии. Оҥоһуктарыгар баай култуураны көрдөрөр үгэс буолбут ойуулар уонна оһуордар туттуллуохтара.

«Билигин маҕаһыыннарга уонна араас дьаарбаҥкаларга, быыстапкаларга саха төрүт оҥоһуктара дэлэй, эппиккэ дылы, тэлгэнэ сытар. Ол гынан баран, кинилэр үксүн кыһыл уонна үрүҥ көмүстэртэн, эбэтэр алтантан оҥоһуллубут киэргэллэр буолаллар. Онтон мин хас биирдии дьахтар эбээн уонна эбэҥки оһуордаах-мандардаах кэрэ киэргэллэри кэтэр кыахтаналларын баҕарабын», — диэн Алеся бырайыагын туһунан хараҕа уоттана кэпсиир.

Бырайыак сыала — үчүгэй оҥоһугу оҥорон таһаарыы эрэ буолбакка, култуура үгэстэрин билиҥҥи эргиэҥҥэ билиһиннэрии, төннөрүү буолар. Алеся хас биирдии оҥоһугун ойуута бэйэтин историятын уонна суолтатын илдьэ сылдьарыгар эрэллээх.

Түмүккэ, оҕо иитиитин, ыарахаттарын, улахан дьиэ кэргэн күннээҕи үөрүүлэрин туһунан олус арыллан кэпсээтэ. «Улахаммыт 20 саастаах, кырабыт үстээх. Биллэн турар, күн сырсыыта, түбүк элбэх. Оҕолор киэҥ сиргэ кэлэн, араас дьарыктарга, куруһуоктарга утумнаахтык дьарыктаналлар. Ол биһигини үөрдэр. Бэйэм биир саамай улахан сыалым-соругум – массыына ыытар быраабы баһылыыр киһи. Миэхэ ол олус наада», — диэн улахан баҕа санаатын үллэһиннэ. Эдэр ийэҕэ олоҕор эргиччи ситиһиилэри баҕарыаҕыҥ!

Ааптар хаартыскаҕа түһэриитэ.

УлуусМедиа