Оттооһун хаамыыта: мобильнай биригээдэ ахсаана эбиллиэхтээҕэр аҕыйаата
Атырдьах ыйын 17 күнүнээҕи туругунан, Саха сирин ходуһаларыгар 232 399 туонна от кэбиһиллэн, бүттүүн былаантан 55 бырыһыана туолла. Ону таһынан улахан хаһаайыстыбалар 3 407 туонна сиилэһи (11,39 бырыһыанын) уктулар уонна 745 туонна сенаһы (5,05 бырыһыанын) суулаатылар.
Тус былааннарын “Сатай” куораттааҕы уокурук 91, Орто Халыма 80, Үөһээ Бүлүү 74, Уус Маайа 72, Уус Алдан 71, Бүлүү уонна Ньурба 66-лыы, Мэҥэ Хаҥалас 63 бырыһыан толорон иһэллэр. Орто кирбиини Амма (57%), Куорунай (54%) аһара түстүлэр. Хайа даҕаны сыллааҕар сыылбатык оттоон иһэр Таатта улууһа 50 бырыһыаннанна.
Ардах халааныгар оҕустарбыт Сунтаар 49, Кэбээйи 45, Өймөкөөн 44, Өлүөхүмэ 22, Хаҥалас 32, Дьокуускай 20, Муома 27, Үөһээ Дьааҥы 15 уонна Эбээн Бытантай 3 бырыһыаннарын ситистилэр. Аллайыахаттан, Булуҥтан, Усуйаанаттан, Өлөөнтөн хас салаа оту быспыттарын туһунан иһитиннэрии баччаҕа диэри суоҕун курдук суох.
Мобильнай биригээдэ ахсаана эбиллиэхтээҕэр аҕыйаан иһэр. Ол курдук, нэдиэлэ анараа өттүгэр (10.08.2026) 62, онтон атырдьах ыйын 13 күнүнээҕи дааннайынан 91 биригээдэ оттуу тахсыбыт буоллаҕына, отчуоттанар кэмҥэ 50-ҥа диэри көҕүрээбит. Амма 20 звенота 911, Куорунайга (12) 472,50, Уус Алдаҥҥа (6) 309, Орто Халымаҕа (1) 100, Сунтаарга (1) 70 туонналыы оту туруордулар. Өлүөхүмэ 10 биригээдэтиттэн сибидиэнньэ киирэ илик. Онон билиҥҥитэ 40 звено мунньан-тараан 1 963 туонна кэбиһиилэннэ.
Василий Никифоров
Поделиться в MAX Сельское хозяйствосенокос