Оттооһун хаамыыта: уонча улуус биэтэккэ чугаһаата

Атырдьах ыйын 27 күнүнээҕи туругунан, өрөспүүбүлүкэ үрдүнэн 305 251 туонна от кэбиһиллэн, бүттүүн былаантан 72 бырыһыана туолла. Ону тэҥэ 9 137 туонна сиилэс угулунна (31%) уонна 1 968 туонна сенаж сууланна (13%).

Үгэс курдук, былааннаах отторун толорор кирбиигэ чугаһаабыт 10 бастыҥ улууһу, уокуругу ааттаан туран билиһиннэрдибит (инфографикаҕа көр). Бу сырыыга 80 бырыһыантан таһаарбыттар киирдилэр. Билиҥҥитэ “Сатай” куораттааҕы уокурук 350 туонна от былааннааҕын 600 туоннаҕа тириэрдэн, балтараа бүк аһара толордо. Ньурба уонна Орто Халыма 90 бырыһыаннаах кирбиини төлө түстүлэр.

Мэҥэ Хаҥалас улууһа ааспыт отчуокка (24.08.2026) отун ыйааһынынан Чурапчыны куоппут эбит буоллаҕына, билигин эмиэ иннигэр түһэрдэ: туһааннааҕынан 34 691 уонна 34 701 туонналыы кэбиһиилэннилэр. Бу муҥутуур былааннаах улуустар иккиэн сүүс бырыһыаны ылбаттарын сабаҕалыыллар. Ол курдук, мэҥэлэр 44 369 туоннаттан 43 147, чурапчылар 40 тыһыынчаттан 36 800 туонналыы бэлэмнииргэ суоттаналлар.

Билгэ – билгэнэн. Атырдьах ыйын 24 күнүгэр диэри өрөспүүбүлүкэ бүттүүн былааныттан 87 бырыһыана туолара сабаҕаланара. Бу сырыыга 83 бырыһыаҥҥа диэри көҕүрээбит. Ол иһигэр 23 182 туонна от былааннаах Бүлүү улууһа эмискэ “15 982 туонна оту булунарга билгэлиир, ол аата 7 200 туоннаны итэҕэс оттоору олорор” эбит. Бу кэмҥэ, бэлиэр, 20 427 туонна кэбиһиилээхтэр эбээт.Тугун-ханныгын чуолкайдаары Бүлүү улууһун тыатын хаһаайыстыбатын салайар Павел Иннокентьевтан ыйыппыппар:

“Урукку сыыппара буолуо. Былааммытын сыыйа толорор санаалаахпыт”, – диэтэ.

Бүлүүлэр өссө атыыга оттуохтаахтар. Орто Халыма эмиэ 2 634 туонна оту бэлэмнииргэ “билгэлиирин” быдан аһарда: отчуоттанар кэмҥэ 4 049 туонна кэбиһиилээх. Онон, балаһыанньа аһара мөлтөх буолбатах. Этэргэ дылы, биэтэк билиэ.

Василий Никифоров

УлуусМедиа