Атырдьах ыйын бүтүүтэ от былаанын 80-ча бырыһыана туолла

Атырдьах ыйын бүтэһик күнүнээҕи суһал иһитиннэриигэ сигэннэххэ, Саха сирин ходуһаларыгар 328 706 туонна от кэбиһиллэн, өрөспүүбүлүкэ былааныттан 78 бырыһыана туолла. Ону таһынан сүөһү сүмэһиннээх аһылыгар 11 684 туонна сиилэс угулунна (39%) уонна 3 257 туонна сенаж сууланна (22%).

Улуустар уонна уокуруктар ортолоругар “Сатай” куораттааҕы уокурук былаанын икки бүк толордо (200%), Аллараа Халыма кыратык аһарда (101%), Ньурба чугаһатта (98%), Уус Маайа 96, Орто Халыма 95, Бүлүү уонна Чурапчы 91-дии, Үөһээ Бүлүү 89, Уус Алдан 87, Амма 80 бырыһыаннаахтар. Айылҕа моһолун көрсүбүт Эбээн Бытантай 19, Үөһээ Дьааҥы 34, Муома 44, Дьокуускай 50, Хаҥалас 53, Өлүөхүмэ 63, Өймөкөөн 65, Сунтаар 71, Кэбээйи 73, Абый 77, Нам 80 бырыһыанныыга таҕыстылар.

Отчуоттанар кэмҥэ 108 мобильнай биригээдэ, ситэтэ суох дааннайынан, 10 781 туонна оту туруорбут. Уончалыы көстөөх үрэх баһыгар сибээс тиийбэтэ биллэр. Бүлүүгэ 30 биригээдэ 2 870, Амма 12 звенота 2 648 туонналыы оттоммуттар. Чурапчыга (13) 1 227, Уус Алдаҥҥа (12) 898, Куорунайга (3) 806, Хаҥаласка (14) 755, Томпоҕо (5) 720 туонналыыны кэбиспиттэр.

Санаттахха, улуустар биэрэр сабаҕалааһыннарынан, өрөспүүбүлүкэ үрдүнэн былааннаммыт от 83 бырыһыана, ол эбэтэр 349,7 тыһ. туонната толоруллуохтаах. Онон аны 20-21 тыһ. туонна кэбиһии турдаҕына, быйылгы от үлэтэ түмүктэнэр бадахтаах. Ол гынан баран, ааспыкка бэлиэтээбитим курдук, сорох сыыппаралар “сиикэйдэр”, хас даҕаны улуус билгэлээбит кирбиитин аһарбытынан сирдэтэр буоллахха, былааны толоруу бырыһыана 90-ҥа чугасаһар чинчилээх.

Василий Никифоров  

УлуусМедиа