Сир эдэр хаһаайына фермер кылааһыгар уһаарыллан тахсыаҕа
Билии күнүгэр хас даҕаны оскуолаҕа агрокылаастары арыйдылар. Ол кэмҥэ Мэҥэ Хаҥалас улууһун Балыктаах орто оскуолатыгар Гавриил Адамов “Сир эдэр хаһаайына” бырайыагынан өрөспүүбүлүкэҕэ бастакынан фермер кылааһа аанын тэлэччи арыйда.
Быйылгы үөрэх дьылыгар фермер кылааһыгар оскуола үрдүкү кылаастарын үөрэнээччилэриттэн 10 оҕо дьарыктаныаҕа. Кинилэр төрөппүттэрин кэтэх эбэтэр бааһынай хаһаайыстыбаларыгар көмөлөһүөхтэрэ, нэһилиэк тыа хаһаайыстыбатын табаарын оҥорооччуларыгар быраактыкаланыахтара уонна оскуоланы бүтэрэллэригэр бырайыак бэлэмнээн көмүскүөхтэрэ.
Фермер кылааһа “АПК-ҕа каадырдары” федеральнай бырайыак агротехнологическай кылаастарыгар майгынныыр эрээри, тыа хаһаайыстыбатын уонна ас-үөл бэлиитикэтин миниистирэ Артем Александров уонна Балыктаах нэһилиэгин баһылыга Ньургун Габышев, Балыктаах орто оскуолатын дириэктэрэ Егор Иванов өйөөннөр, өрөспүүбүлүкэ бэйэтин иһиттэн тахсыбыт бастакы сонун холонуу буолар.
Үөрүүлээх түгэҥҥэ “Сир эдэр хаһаайына” бырайыак ааптара Гавриил Иннокентьевич Адамов уонна Аартыкатааҕы судаарыстыбаннай агротехнологическай университет бастакы проректора Аян Нюкканов ыалдьыттааннар, үөрэнээччилэргэ уонна учууталларга алгыс тылларын анаатылар, айымньылаах, соргулаах үлэни баҕардылар. Тыа хаһаайыстыбатын министиэристибэтиттэн миниистири солбуйааччы Сахайаана Павлова сылдьан эҕэрдэлээтэ. Сахайаана Афанасьевна пилотнай бырайыагы өйөөбүт Балыктаах нэһилиэгин уонна оскуолатын салалталарыгар махтанна итиэннэ бу уопут атын улуустарга, нэһилиэктэргэ тарҕанарыгар эрэнэрин биллэрдэ.
Василий Никифоров
Мария Сивцева (ТХМ пресс-сулууспата) хаартыскаҕа түһэриилэрэ
Поделиться в MAX НацпроектСельское хозяйство