20 сыл вахтаҕа. Барыта дьиэ кэргэним туһугар

Хоту дойду хоһууна, Анаабыртан төрүттээх Руслан Спиридонов бу күннэргэ сэттис төгүлүн аҕа буолар дьолу биллэ. Кини билигин бэйэтэ “Маят” көмүс хостуур бириискэ “Талахтаах” учаастагар үлэ үөһүгэр сылдьар. Дьиэтигэр барыа өссө да ыраах. Ол эрээри, күннэри-түүннэри саныыр санаата, ахтар ахтылҕана — дьиэ кэргэнэ, оҕолоро уонна көрсө илик саҥа төрөөбүт кыракый кыысчаана…

Руслан “Анаабыр алмаастара” тэрилтэҕэ 2006 сылтан үлэлиир. Ол саҕана армияттан кэлбит эдэр уол ханнык баҕарар үлэҕэ ылсарга бэлэм эбит. Маҥнай остолобуойга иһит сууйааччынан, баанньык көрөөччүтүнэн үлэтин саҕалаабыт. Онтон кэлин 2009 сыллаахха «Машинист промывочных машин» диэн идэҕэ үөрэнэн, күн бүгүн бу хайысханан үлэлии сылдьар.

— Руслан, наһаа эппиэтинэстээх үлэҕэ үлэлии сылдьаҕын. Бүтүн фабрика, хас биирдии техника, үлэһит үлэтин хонтуруоллаан салайар эбиккин. Үлэҥ биир күнэ хайдах ааһарый?

— Сарсыарда эрдэ кэлэн туох баар оборудованиены барытын бэрэбиэркэлиибин. Ымпыгын-чымпыгын көрөбүн, дьэ, ол кэннэ көмүс сууйар фабриканы үлэлэтэн киирэн барабын. Стационарнай рация нөҥүө улахан техникалары барытын диспетчер курдук салайа олоробун.

— Ханнык түгэҥҥэ көмүс фабрикатыгар үлэлиэхпин баҕарар эбиппин диэн санаа киирбитэй?

— Бастаан вахтаҕа иһит сууйааччытынан саҕалаатаҕым. Ол сылдьан бэйэм саастыы машинист уолаттары көрөн ымсыырар этим. Ээ, уонна харса суох салалтаҕа киирэн миигин фабрикаҕа ыытыҥ, кинилэр курдук сылдьыахпын баҕарабын диэн этэр этим (күлэр).

— Ону туох дииллэр этэй?

— Биллэн туран, анал үөрэҕи көрдүүллэр. “Анаабыр алмаастара” тэрилтэ иһинэн үлэлиир “Профресурс” үөрэх киинэ ол саҕана сыл аайы Сааскылаахха кэлэн, ыччакка саҥа идэ баһылыырга кыах биэрэр этэ. Мин ону туһаммытым уонна отой кэмсиммэппин. “Талахтаах” учаастакка үлэлээбитим номнуо 10 сыл буолла.

Улахан дьиэ кэргэн — улахан эппиэтинэс. Ол туһунан Руслан үлэттэн чэрдийбит илиитинэн кааскатын көннөрө-көннөрө маннык диэн санаатын үллэстэр:

— 4 кыыстаахпын, 3 уоллаахпын. Улахан кыыһым Дьокуускайга номнуо устудьуон. Мин үлэбин сөбүлүүбүн, ол гынан баран улахан оҕолорум улааталларын көрбөтөх да курдукпун. Наар манна үлэбэр баарбын. Кэргэним вахталаан бүтэрбин, аттытыгар баар буоларбын баҕарар. Онон билигин наһаа 6-лыы ый эҥин сылдьыбакка, 3-4 ый буола-буола дьиэбэр бара турабын. Саатар кыра оҕолорум улааталларын көрүөм, кинилэргэ бириэмэбин аныахпын баҕарабын…

Спиридоновтар дьиэ кэргэн Анаабыр улууһун Үрүҥ Хайа бөһүөлэгин биир тумус туттар ыала. Аҕыйах күннээҕитэ сэттис оҕолорун, бэһис кыыстарын күн сирин көрдөрөн үөрүүлэрэ үгүс.

Элбэх оҕолоох аҕа Руслан инникитин “Анаабыр алмаастара” Үрүҥ Хайаҕа баар базатыгар көһөн үлэлиир былааннаах. Оччотугар дьиэ кэргэниттэн, кырачаан кыыһын оҕолоон күннээҕи олоҕо дьолунан туола туруо буоллаҕа.

Камила Михайлова

Ааптар хаартыскаҕа түһэриилэрэ

УлуусМедиа