«Спорду таптыыр киһи — доруобай буолар»

Сунтаар улууһун 83 саастаах олохтооҕо Варвара Макарова сүүрүүнэн дьарыктанар. Кыһыҥҥы кэмҥэ бассейҥҥа нэдиэлэҕэ үстэ сылдьар, скандинавскай хаамыынан умсугуйар, халлаан сылыйда эрэ күн ахсын «Туймаада» стадиоҥҥа эрчиллэр. Бу туһунан «Далбар Хотун» сурунаал суруйар. 

Варвара Григорьевна Макарова Сунтаар улууһун бочуоттаах гражданина, «Гражданскай килбиэнин» бэлиэ хаһаайына, мэдиссиинэ туйгуна, бэтэрээн маастардарга Арассыыйа спордун маастара, бэтэрээн маастардарга Арассыыйа, Европа, Аан дойду хас да төгүллээх чемпионката. 2019 сыллаахха Москваҕа ыытыллыбыт Аан дойдутааҕы скандинавскай хаамыы күрэҕин призера. 2023 сыллаахха Өймөкөөҥҥө ыытыллыбыт күрэххэ бэтэрээннэргэ 5 км сүүрүүгэ 2 миэстэни ылбыта.

Варвара Григорьевна сүүрүүнэн дьарыгын 45 сааһыгар саҕалаабыт.

«Киһи спордунан хас баҕарар сааһыттан эрчиллэн саҕалыан сөп. Эдэрим буоллар, билигин тренергэ дьарыктаныам, араас спортивнай таҥаһы кэтэ-кэтэ астына эрчиллиэм этэ. Билигин эдэр дьоҥҥо усулуобуйа барыта баар. Онон сытан хаалбакка, күн ахсын бэйэни чэбдигирдэ сылдьыҥ», — диэн бэтэрээн сүүрүүк, чөл олох пропагандиһа Варвара Григорьевна сүбэлиир.

Хаартыска: «Далбар Хотун»

УлуусМедиа