Чурапчыга Кутурҕан күнүгэр анаммыт миитин буолла

Балаҕан ыйын 19-гар Чурапчы улууһугар Кутурҕан уонна кэриэстэбил күнэ бэлиэтэнэр. Бүгүн сарсыарда 10 чаастан Көһөрүллүү мемориалыгар Кутурҕан миитинэ ыытылынна диэн суруйар «Саҥа олох» хаһыат.

Хоту көһөрүллүүгэ утаарыллыбыт биир дойдулаахтарын сырдык ааттарыгар сүгүрүйэн, Чурапчы улууһун тэрилтэлэрин профсоюзнай координационнай Сэбиэтин хамсааһына велопробег тэрийдэ.

Чурапчы дьоно-сэргэтэ Хоту улуустартан дойдуларыгар төннөн кэлиилэрин ситиспит бөдөҥ Судаарыстыбаннай-политическай диэйэтэл, Нам улууһуттан төрүттээх Илья Егорович Винокуров 130 сыла. Бу күн ытык томторго киниэхэ анаммыт мемориальнай дуосканы аһыы сиэрэ-туома ыытылынна.

Манна улууспут баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников уонна Намтан улуус баһылыга Юрий Слепцов, Ленскэй нэһилиэгин баһылыга Петр Сокольников кытыннылар, саҥа аһыллыбыт И.Е.Винокуров дуоскатыгар сибэкки дьөрбөтүн уурдулар.

Оччотооҕу уустук сылларга норуотун дьылҕатын туһугар турууласпыт, өрөспүүбүлүкэбит сайдыытыгар улахан өҥөлөөх тумус туттар саха саарынын туһунан үтүө махтал тылынан ахтан-санаан аастылар.

Салгыы сэрии сылларыгар хоту көһөрүллүүгэ сырдык тыыннарын толук уурбут ытык көлүөнэ дьоммутун ахтар-саныыр, кинилэр тугунан да кэмнэммэт ыар алдьархайдарын үүнэр ыччаттарга тиэрдиигэ, албан ааттарыгар сүгүрүйүүгэ туһуламмыт кутурҕан миитинэ буолла.

Күн бүгүн Чурапчы улууһугар 46 көһөрүллүү кыттыылааҕа олорор. Эһиил Хоту көһөрүллүү 85 сыла бэлиэтэнэр. Онон сибээстээн, Өрөспүүбүлкэ таһымыгар анал кэмитиэт тэриллэн, маныаха туһуламмыт былааннаах үлэ-хамнас, үгүс даьаһаллар ыытыллыахтара.

Ол курдук, Хатылы нэһилиэгэр Көһөрүллүүгэ анаммыт саҥа түмэл дьиэтин тутуу, научнай-практическай кэмпириэнсийэлэр, Кэбээйи, Булуҥ, Эдьигээн улуустарын кытта сөҥнөһөн, үйэтитиигэ анаммыт дьаһаллары тэрийии, пааматынньыктары сөргүтүү, саҥа өйдөбүнньүктэри тутуу о.д.а үлэлэр былааннаналлар.

Аҕа дойду Улуу сэриитин сылларыгар икки бүк иэдээни көрсүбүт Чурапчы алдьархайа хаһан да хатыламматын, кыайыы туһугар сырдык тыыннарын толук уурбут, дойдуларыгар этэҥҥэ эргиллэн, төрөөбүт дойдуларын уйгулаах олоҕун туһугар күүстэрин ууран туран үлэлээбит ытык дьоммут хорсун быһыылара үүнэр көдүөнэҕэ үтүө холобур буола, үйэтитиллэ туруоҕа.

Анна Захарова

Сэмэн Жендринскэй хаартыскаҕа түһэриитэ

УлуусМедиа