Хадаарга саҥа систиэмэнэн саҥа баһылык талылынна

Балаҕан ыйын 20 күнүгэр Хадаар нэһилиэгэр олус улахан суолталаах күн буолла. Бу күн нэһилиэк баһылыгын Арассыыйа үрдүнэн киибит саҥа систиэмэнэн быыбардаатылар, диэн keskil14.ru.

Нэһилиэк депутаттара аһаҕас куоластааһын түмүгүнэн баһылык дуоһунаһыгар турбут кандидаттары сирэй көрсөн олорон таллылар. Бу суолталаах тэрээһиҥҥэ нэһилиэк Сэбиэтин 11 депутатыттан 8-һа кыттыыны ылла.

Нэһилиэк инники 5 сылын сайдыытын түстүүр, быһаарар эппиэтинэстээх тэрээһин аһаҕастык ыытылынна. Депутаттары таһынан нэһилиэк баһылыгын талыыга куонкурус хамыыһыйатын бэрэссэдээтэлэ, улуус баһылыгын солбуйааччыта Алексей Лобанов, хамыыһыйа чилиэнэ, юрист Ньургуйаана Бушкова кыттыыны ыллылар.

Хамыыһыйа араас тургутууларын ааһан, депутаттар түмүктүүр аһаҕас куоластааһыннарыгар икки кандидат киирдэ: Григорий Решетников уонна Иннокентий Яковлев. Регламент быһыытынан кандидаттар биирдиилээн киирэн, нэһилиэк сайдыытын туһунан бырагыраамаларын билиһиннэрдилэр, ыйытыыларга хоруйдаатылар. Онно Григорий Решетников 62 баалы (100%), Иннокентий Яковлев 48 баалы (77,4%) ыллылар.

Григорий Гаврильевич Решетников Хадаар нэһилиэгин олохтооҕо. Үөрэҕин бүтэрэн баран 2006 сылтан 2012 сылга диэри оскуолаҕа, онтон тыа хаһаайыстыбатын специалиһынан үлэлээбитэ. Ол кэнниттэн бу күҥҥэ диэри баһылык солбуйааччыта. Кини бырагырааматын сүрүн хайысхалара нэһилиэк тас көстүүтүн тупсарыыны, коммунальнай, социальнай эйгэни, экономика, куттал суох буолуутун, үп-харчы боппуруостарын хабар. Сүрүн кыһалҕа быһыытынан оскуолаҕа үлэлии кэлэр специалистар олорор дьиэни булунар боппуруостарын бэлиэтээтэ. Ону быһаарарга саҥа дьиэлэри тутууну эбэтэр баар дьиэлэри саҥардыыны көрөрүн туһунан эттэ.

Онтон Иннокентий Иннокентьевич Яковлев – история уонна обществознание учуутала. Чурапчытааҕы Дархан кыһатыгар уонна Чурапчытааҕы колледжка үлэлээбитэ. Кини былаас дьон норуот аттыгар баар буолуохтааҕын бэлиэтээтэ. Нэһилиэк тас көстүүтүн тупсарыы, суол, коммунальнай хаһаайыстыба инфраструктураны, нэһилиэнньэ дьарыктаах буолуутун инники күөҥҥэ туруорар. Спорт өттүгэр саҥа саалаҕа атын нэһилиэктэри кытта алтыһан, табаарыстыы матчтары ыытар былааннааҕын эттэ.

Кандидаттар бырагыраамаларын кэпсээбиттэрин кэннэ депутаттар 15 мүнүүтэ устата санааларын үллэһиннилэр. Ол кэнниттэн куоластааһын саҕаланна. 6 депутат Григорий Решетников, 2 депутат Иннокентий Яковлев туһугар куоластаатылар. Онон Хадаар нэһилиэгин саҥа баһылыгынан Григорий Решетников буолла. Григорий Гаврильевич депутаттарга, нэһилиэк олохтоохторугар махталын биллэрдэ, нэһилиэгин, дьонун туһугар үлэлииргэ бэлэмин биллэрдэ. Иннокентий Яковлевка көхтөөх кыттыытын иһин махтаннылар, интэриэһинэй көрүүлэрдээҕин бэлиэтээтилэр.

Саҥа баһылык солотугар киирэр сиэрэ-туома балаҕан ыйын 28 күнүгэр ыытыллыаҕа.

Өр сылларга биһиги нэһилиэкпитин салайабыт Афанасий Афанасьевич Степановка махталбын тиэрдиэхпин баҕарабын. Тус бэйэм көрүүбэр, кини хамсык ыарыытынан сибээстээн турбут карантин, онтон салгыы байыаннай дьайыы саҕаланан, уустук кэмнэргэ үлэлээтэ. Биһиги кэммитигэр тирээн турар уустук балаһыанньаҕа тыа сирин нэһилиэгэ хайдах үлэлиэхтээҕин сүрүн хайысхатын ыйан-кэрдэн биэрдэ дии саныыбын. Афанасий Афанасьевич үлэлээбит кэмигэр дэриэбинэбит олус тубуста диэн көрөбүн. Грантовай үлэҕэ, федеральнай бырагыраамаларга кыттан, кыайыылаах буолбут түмүгүн нэһилиэкпит тас көстүүтүгэр көрөбүт.

Афанасий Афанасьевич оҕолору истэр, кинилэр санааларын учуоттуур, оҕолорго болҕомтолоох баһылык. Биһигини, «Кэскил» медиа-оскуола юнкордарын кытта атах тэпсэн олорон кэпсэтэн, санаатын үллэстэн, баар кыһалҕалары аһаҕастык кэпсээн, төрөөбүт нэһилиэкпит олоҕор, кыһалҕатыгар, сайдыытыгар өйдүүн-санаалыын чугаһатта. Афанасий Афанасьевич, эйиэхэ юнкордар ааттарыттан инники олоххор ситиһиилэри, доруобуйаны баҕарабын.

Саҥа талыллыбыт баһылыкпыт Григорий Гаврильевич Решетников Афанасий Афанасьевич Степанов үлэтин өссө сайыннаран, байытан биэриэ диэн эрэнэбит.

Алена КСЕНОФОНТОВА, X кылаас, «Кэскил» медиа-оскуола юнкора, С.Д. Флегонтов аатынан Хадаар орто оскуолата, Чурапчы

УлуусМедиа