Ананий Кононович Андреевка аналлаах тэрээһиннэр салҕаналлар

Саха АССР Киин Ситэриилээх Кэмитиэтин уонна Совнаркомун бэрэссэдээтэлэ, Дьокуускай куорат исполкомун бэрэссэдээтэлэ, Дьокуускай куорат Киин электрическэй станциятын дириэктэрэ, Саха АССР коммунальнай хаһаайыстыбатын наркома, Дьохсоҕонтон төрүттээх Ананий КононовичАндреев төрөөбүтэ 125 сылынан Ил Дархан дьаһалынан хамыыһыйа тэриллэн үлэ былаан быһыытынан бара турар.

Ол туһунан А.К. Андреев аатын тилиннэриигэ ылсан ситиһиилээхтик үлэлии сылдьар энтузиаст, А.К.Андреев аатынан ОДьКХ музейын сэбиэдиссэйэ Галина Егоровна Арылахова маннык кэпсээтэ:

— Өрөспүүбүлүкэ сайдыытын төрүттэспит бөдөҥ судаарыстыбаннай деятель Ананий Кононович Андреев төрөөбүтэ 125 сылыгар аналлаах өрөспүүбүлүкэтээҕи тэрээһиннэр чэрчилэринэн үлэ былааннаахтык уонна киэҥ хабааннаахтык бара турар. Бу саас “Ананий Кононович Андреев 1920-1930сс. Саха сирин биллэр судаарыстыбаннай уонна политическай деятелэ” төгүрүк остуол Гуманитарнай чинчийии уонна аҕыйах ахсааннаах хотугу омуктар кыһалҕаларын институтун конференц-саалатыгар буолан ааспыта.

“Ананий Кононович Андреев – видный государственный деятель: штрихи к портрету”, “Центральное дело”: трагические страницы жизни А.К. Андреева”, “Роль А.К. Андреева в политической административной, экономической и культурной жизни Якутской АССР”, “Разработка принципов административно-организационных реформ в Якутской АССР под руководством А.К. Андреева”, “А.К. Андреев и развитие сельского хозяйства республики в 1920-1930-е гг.”, “Роль А.К.Андреева в проведении коллективизации в Якутской АССР”, “Задачи промышленного освоения недр в планах Правительства ЯАССР в 1929-1931гг.”, “Комитет содействия народностям северных окраин при ЯЦИК (1924-1935)”, “Бар дьон туһугар үлэлээн-олорон ааспыт киһи умнуллубат”,  “Увековечение славного имени А.К. Андреева” уо.д.а. дириҥ ис хоһоонноох дакылааттары истибиттэрэ.

Тэрээһиҥҥэ Тааттаттан, Дьокуускайтан 80-тан тахса ыалдьыт кэлэн кыттыыны ылбыта. Ол курдук, дойдуларыгар олус чугас, ытыктанар дьоммут Елена Филимоновна, Владимир Иннокентьевич Кузьминнар, Аграфена Гаврильевна Тистяхова, Дьокуускайдааҕы коммунальнай тутуу техникумун устудьуоннара уо.д.а.

Саха сирин култууратын үтүөлээх үлэһитэ, СӨ култууратын туйгуна Афанасий Николаевич, кини төрөппүт уола, СӨ народнай артыыһа Николай Попов, бииргэ төрөөбүт быраата РФ үтүөлээх артыыһа, СӨ народнай артыыһа Петр Баснаев кэрэ куоластарынан ыллаан-туойан олус киэргэппиттэрэ, дьон махталын ылбыттара.

Төгүрүк остуолга А.К. Андреев төрдүн-ууһун, бөдөҥ салайааччы быһыытынан ураты көрүүтүн, норуотун, өрөспүүбүлүкэтин сайдыытын туһугар киэҥ хабааннаах үлэтин ырытыылары, дакылааттары сэҥээрэ истибиппит.

Ити кэнниттэн СӨ Бырабыыталыстыбатын дьиэтигэр,Өрөспүүбүлүкэ саалатыгар үөрүүлээх быһыыга-майгыга А.К. Андреев үбүлүөйдээх сылыгар сөп түбэһиннэрэн, коммунальнай хаһаайыстыба үлэһиттэрин күнүгэр аналлаах үөрүүлээх мунньах ыытыллыбыта. Бу тэрээһиннэргэ СӨ Национальнай библиотеката уонна А.К. Андреев аатынан ОДьКХ музейа улахан ис хоһоонноох кинигэ быыстапкатын туруоран, хаһыакка тахсыбыт матырыйааллары түмэн, СӨ Национальнай архыыба А.К. Андреев өрөспүүбүлүкэтин туһугар үлэлии олорбут кэминээҕи олус интэриэһинэй докумуоннары көрдөрүүгэ туруорбуттара улахан сэҥээриини ылыан ылбыта.

Маны таһынан, кулун тутар ыйга Анна Константинова Билюкина салайааччылаах И.А. Аргунов аатынан Тааттатааҕы библиотечнай ситим тэрийиитинэн А.К. Андреевка аналлаах библиотечнай уруоктары, сценарийдары көрүү күрэхтэрин ыытта. Манна олус үчүгэй үлэлэр киирбиттэриттэн үөрдүбүт, астынныбыт.

Ити курдук, сүдү биир дойдулаахпыт Ананий Кононович Андреев төрөөбүтэ 125 сылынан улахан тэрээһиннэр элбэх киһини хабан үрдүк таһымҥа ыытылыннылар. Балаҕан ыйын 25 күнүгэр ОДьКХ министерствотыгар Ананий Кононович Андреев сырдык аатыгар аналлаах үөрүүлээх тэрээһин ыытыллыаҕа. Инникитин сыал-сорук толору ситиэ диэн эрэнэбит, сыл устата үйэтитии үлэтэ салҕаныаҕа.

УлуусМедиа